13.11.2009   

MT

Il-Ġurnal Uffiċjali tal-Unjoni Ewropea

C 272/1

1.

Fit-3 ta’ Ġunju 2009 l-Bank Ċentrali Ewropew (BĊE) irċieva talba mill-Kunsill tal-Unjoni Ewropea għal opinjoni fuq proposta għal Direttiva tal-Parlament Ewropew u tal-Kunsill dwar Maniġers ta’ Fondi ta’ Investiment Alternattiv u li temenda d-Direttivi 2004/39/KE u 2009/…/KE (1) (minn hawn ’il quddiem id-“direttiva proposta”).

2.

Il-kompetenza tal-BĊE biex jagħti opinjoni hija bbażata fuq l-ewwel inċiż tal-Artikolu 105(4) tat-Trattat li jistabbilixxi l-Komunità Ewropea. Skont l-ewwel sentenza tal-Artikolu 17.5 tar-Regoli tal-Proċedura tal-Bank Ċentrali Ewropew, il-Kunsill Governattiv adotta din l-opinjoni.

3.

Il-BĊE jappoġġa l-intenzjoni li jiġi pprovdut qafas regolatorju u superviżorju armonizzat għall-attivitajiet tal-maniġers ta’ fondi ta’ investiment alternattiv (AIFMs) fl-Unjoni Ewropea. Id-dispożizzjonijiet proposti fuq ir-rapportar lill-awtoritajiet kompetenti għandhom, fil-prinċipju, jikkontribwixxu b’mod sinjifikanti biex itejbu l-monitoraġġ tal-istabbiltà finanzjarja u b’hekk biex ikun hemm valutazzjonijiet tar-riskji għall-istabbiltà finanzjarja infurmati aħjar konnessi mal-attivitajiet tal-AIFMs u l-Fondi ta’ Investiment Alternattivi (AIFs) li huma jiġġestixxu. L-armonizzazzjoni ta’ regoli u s-sistema tal-passaport u regolatorja tal-UE komuni riżultanti għandha tkun ta’ benefiċċju għall-integrazzjoni finanzjarja billi jittejbu l-kundizzjonijiet ugwali fl-UE.

4.

Il-BĊE jħeġġeġ lill-Kummissjoni tal-Komunitajiet Ewropej biex tkompli d-djalogu mal-imseħbin internazzjonali tagħha, partikolarment l-Istati Uniti, biex jiġi żgurat li jkun hemm qafas superviżorju u regolatorju koerenti dinji. Kif ġie innutat mill-Eurosistema fil-kontribuzzjoni tagħha lill-konsultazzjoni tal-Kummissjoni fuq il-fondi ħeġġ, hija meħtieġa risposta kkoordinata internazzjonali minħabba n-natura internazzjonali ħafna tal-industrija u r-riskji konsegwenti tal-arbitraġġ regolatorju u evażjoni (2). Dan jista’ jgħin biex jiġi żgurat li r-rekwiżiti f’pajjiżi terzi għall-AIFMs ikunu ekwivalenti għal dawk eżistenti fl-UE u li AIFMs mhux iddomiċiljati fl-UE ikunu jistgħu jibbenefikaw mill-aċċess għas-swieq tal-UE fuq bażi ta’ reċiproċità.

5.

Il-premessa 3 tad-direttiva proposta tidentifika, bħala wieħed mill-oġġettivi ċentrali tagħha, it-twaqqif ta’ qafas li jista’ jindirizza r-riskji “relatati mal-investituri, parteċipanti oħra fis-suq u swieq oħra” li għandhom l-AIFs “b’kunsiderazzjoni għall-firxa varjata ta’ strateġiji u tekniki ta’ investiment użati mill-AIFM”. F’dan ir-rigward, jiġi nnutat li d-direttiva proposta tikkonċerna t-tipi kollha ta’ fondi mhux koperti bid-Direttiva 2009/…/KE fuq il-koordinazzjoni ta’ liġijiet, regolamenti u dispożizzjonijiet amministrattivi dwar impriżi għall-investiment kollettiv f’titoli trasferibbli (UCITS) (abbozzata mill-ġdid) (3) bħal fondi ħeġġ, fondi ta’ prodotti li jservu bħala flus, fondi tal-proprjetà immobbli miftuħin, fondi li jingħalqu, fondi ta’ ekwità privata u fondi ta’ kapital ta’ riskju. Dawn il-fondi jiffurmaw grupp eteroġenju ta’ ġabriet ta’ investimenti, organizzati taħt forom diversi legali f’ġurisdizzjonijiet differenti, kemm ġewwa u barra l-UE. Hemm bżonn ta’ iktar ħsieb fuq din il-kwistjoni. F’dan ir-rigward, id-dispożizzjonijiet tad-Direttiva proposta għandhom jitfasslu b’mod li jirrifletti aħjar id-differenzi fundamentali bejn l-AIFs.

6.

Il-banek ċentrali kollha għandhom jiġu espressament esklużi mill-ambitu tad-Direttiva proposta.

7.

B’mod iktar inġenerali, il-BĊE jara riskju potenzjali ta’ arbitraġġ regolatorju bejn l-AIFMs, il-kumpanniji tal-assigurazzjoni u l-istituzzjonijiet ta’ kreditu, li fosthom id-Direttiva proposta ma toħloqx kundizzjonijiet ugwali. Ħlief għall-immaniġġjar tal-assi tal-AIFMs stess, ir-rekwiżiti taħt id-Direttiva proposta għandhom jiġu applikati b’mod koerenti għall-AIFMs, lill-istituzzjonijiet ta’ kreditu u ’l-kumpanniji tal-assigurazzjoni. Fl-istess sens, id-Direttiva proposta ma tispeċifikax kriterji “xierqa” u rekwiżiti ta’ esperjenza minimi għall-maniġers anzjani u diretturi tal-AIFM’s. Għal raġunijiet ta’ kundizzjonijiet ugwali, il-BĊE għalhekk jissuġerixxi li jiddaħħlu dispożizzjonijiet f’dan is-sens fid-Direttiva proposta skont dispożizzjonijiet simili f’oqsma oħrajn tal-acquis finanzjarju tal-UE.

8.

Il-BĊE jinnota li ċerti dispożizzjonijiet fid-direttiva proposta (pereżempju, dawk relatati ma’ bejgħ skopert, titolizzazzjoni u l-kisba ta’ influwenza ta’ kontroll fil-kumpanniji) huma intiżi li jirregolaw kwistjonijiet orizzontali li jikkonċernaw l-parteċipanti kollha tas-suq, mhux biss l-AIFMs. Filwaqt li l-BĊE jifhem ir-raġuni għal uħud minn dawn id-dispożizzjonijiet, il-BĊE jissuġġerixxi li, minflok, tiġi kkunsidrata l-introduzzjoni ta’ dawk id-dispożizzjonijiet biss permezz ta’ leġiżlazzjoni li żżomm kundizzjonijiet ugwali fost diversi parteċipanti fis-suq, pereżempju billi dawk id-dispożizzjonijiet jiddaħħlu f’leġiżlazzjoni tal-UE eżistenti applikabbli fis-setturi kollha.

9.

Il-BĊE jilqa’, fil-prinċipju, id-dispożizzjonijiet dwar l-obbligi ta’ rappurtat tal-AIFMs (li jkunu meħtieġa li jipprovdu informazzjoni ta’ kwalità għolja lill-awtoritajiet kompetenti) u l-mekkaniżmi għall-iskambju ta’ informazzjoni bejn l-awtoritajiet ta’ superviżjoni. Madankollu, il-BĊE jissuġġerixxi li għandha ssir analiżi fil-fond biex l-obbligi tar-rappurtar jiġu ffokati fuq dejta li wieħed jista’ jistenna b’mod raġonevoli li huma rilevanti għall-monitoraġġ tal-istabbiltà finanzjarja biex tiġi żgurata l-konsistenza tal-obbligi tar-rappurtar tad-dejta fil-qafas legali li ser jistabbilixxi l-Bord tar-Riskju Sistemiku Ewropew (BERS) u s-Sistema Ewropea ta’ Superviżuri Finanzjarji (ESFS) u biex dawn il-korpi ikunu jistgħu jiksbu informazzjoni superviżorja meħtieġa u xierqa biex jissodisfaw il-kompiti rispettivi tagħhom (4). Filwaqt li l-obbligi tar-rappurtar iffokat li jirriżultaw minn din l-analiżi għandhom ikunu riflessi fid-Direttiva proposta, iktar speċifikazzjoni għandha tkun possibbli permezz tal-komitoloġija. Il-BĊE huwa lest li jgħin fl-analiżi.

10.

Tista’ tingħata l-importanza mistħoqqa għall-allinjament ta’ ċerti rekwiżiti għar-rapportar lill-awtoritajiet kompetenti (kif speċifikat fl-abbozz tal-Artikoli 21 u 24) ma’ dawk tar-Regolament BĊE/2007/8 tas-27 ta’ Lulju 2007 dwar istatistika fir-rigward tal-attiv u l-passiv ta’ fondi ta’ investiment (5). Dan ir-Regolament, li bħalissa japplika għall-fondi ta’ investiment iddomiċiljati fiż-żona euro, jippermetti li tinġabar statistika tal-karta tal-bilanċ armonizzata. L-allinjament ma’ dawn ir-rekwiżiti ta’ rapportar u l-użu ta’ galvu għar-rapportar standardizzat għall-AIFs kollha koperti bid-direttiva proposta jikkontribwixxi għall-valutazzjoni tar-riskju sistemiku mal-UE kollha. Jimminimizza wkoll il-piż tar-rapportar addizzjonali għal dawk l-AIFs li diġà qed jirrapportaw din l-informazzjoni. Filwaqt li d-Direttiva proposta għandha tispeċifika r-regoli fundamentali li japplikaw għal mudelli tan-negozju implimentati mill-AIFMs, il-BĊE jappoġġa wkoll li jkun hemm l-użu ta’ proċeduri tal-komitoloġija biex jitfasslu wħud mid-dispożizzjonijiet iktar tekniċi u ddettaljati mmirati lejn l-istandardizzazzjoni mal-UE kollha tal-informazzjoni msemmija fl-Artikoli 21 u 24. Il-partiti koperti mir-rekwiżiti ta-rappurtar jistgħu jinkludu għalhekk, pereżempju, l-informazzjoni tal-karta tal-bilanċ tal-AIF ibbażata fuq ir-Regolament BĊE/2007/8, prospetti tad-dħul, prospetti tal-fluss tal-kontanti u projezzjonijiet (inklużi sorsi ewlenin ta’ fondi, lista ta’ sensara primarji u arranġamenti tal-likwidità ta’ kontinġenza f’xenarji differenti), restrizzjonijiet ta’ fidi ta’ investituri, assi miżmumin bl-użu ta’ marka għal-immudellar ta’ valutazzjoni, ingranaġġ, pożizzjonijiet f’derivattivi (inklużi ammonti kunċettwali u kollateral elenkat), assi illikwidi u assi mhux ta’ livell ta’ investiment, u l-użu ta’ short-selling. Il-BĊE jistenna li l-BERS ser jiġi kkonsultat fuq miżuri ta’ implimentazzjoni li jiġu adottati f’dan il-qasam.

11.

Il-kunċett ta’ ingranaġġ huwa fundamentali għall-mudell ta’ negozju implimentat minn ħafna AIFMs. Id-definizzjoni ta’ “ingranaġġ” taħt id-direttiva proposta ma tinkludix kunċetti ta’ relazzjoni ta’ ingranaġġ speċifiku. Il-BĊE huwa mħasseb li, mingħajr kjarifikazzjonijiet addizzjonali mdaħħla fit-test tad-Direttiva proposta, jista’ jkun diffiċli li tiġi implimentata d-definizzjoni proposta. Miżuri ta’ implimentazzjoni f’dan il-qasam għandhom jibbenefikaw mill-kontribuzzjonijiet tekniċi ta’ superviżuri ta’ banek ċentrali u banek li mhumiex ċentrali. Għalhekk, il-BĊE jistenna li l-BERS u l-ESFS jiġu kkonsultati fuq miżuri ta’ implimentazzjoni li jiġu adottati f’dan il-qasam, inkluż kif propost fl-Emenda 7 fl-Anness, fuq miżuri possibbli li jirfinaw il-kunċett ta’ “ingranaġġ”, u fuq li jiġi speċifikat meta AIF jkun qed juża livelli għoljin ta’ ingranaġġ fuq bażi sistematika.

12.

L-Artikolu 25(3) tad-direttiva proposta tipprovdi li l-Kummissjoni għandha tadotta miżuri ta’ implimentazzjoni li jiffissaw limiti għal-livell ta’ ingranaġġ li l-AIFMs jistgħu jużaw wara li jitqiesu, fost l-oħrajn, it-tip ta’ AIF, l-istrateġija tagħhom u s-sorsi tal-ingranaġġ tagħhom. Il-BĊE jirrikonoxxi li l-ingranaġġ jista’ joħloq riskji importanti għall-istabbiltà finanzjarja. Minħabba l-flessibbiltà tal-investiment tagħhom, AIFMs għandhom rwol importanti fl-appoġġ tal-likwidità tas-suq finanzjarju, u għalhekk jikkontribwixxu għall-funzjonament tas-suq finanzjarju u l-iskoperta tal-prezz effettivi. Biex jinżamm dan ir-rwol jeħtieġ li jkun hemm limiti ta’ ingranaġġ ta’ riskju aġġustati kif jixraq u bbilanċjati applikabbli għall-AIFs li jqisu l-profil tar-riskju sħiħ tagħhom filwaqt li ma jtellfux eċċessivament il-flessibbiltà tal-investiment tagħhom.

13.

Il-BĊE huwa lest, jekk ikun meħtieġ, li joffri iktar fehmiet fuq kwalunkwe abbozz rivedut li jsir disponibbli. Meta l-BĊE jirrakkomanda li ssir emenda għad-direttiva proposta, jingħataw proposti ta’ abbozzar speċifiċi fl-Anness akkumpanjati bi spjegazzjoni. Il-biċċa l-kbira ta’ dawn il-proposti ma jindirizzawx l-osservazzjonijiet iktar ġenerali magħmulin hawn fuq.