EUR-Lex Aċċess għal-liġi tal-Unjoni Ewropea
Dan id-dokument hu mislut mis-sit web tal-EUR-Lex
Dokument 32017D0035
Decision (EU) 2017/2097 of the European Central Bank of 3 November 2017 on the methodology for calculating sanctions for infringements of the oversight requirements for systemically important payment systems (ECB/2017/35)
Deċiżjoni (UE) 2017/2097 tal-Bank Ċentrali Ewropew tat-3 ta' Novembru 2017 dwar il-metodoloġija għall-kalkolu ta' sanzjonijiet għall-ksur tar-rekwiżiti tas-sorveljanza għal sistemi ta' ħlas sistemikament importanti (BĊE/2017/35)
Deċiżjoni (UE) 2017/2097 tal-Bank Ċentrali Ewropew tat-3 ta' Novembru 2017 dwar il-metodoloġija għall-kalkolu ta' sanzjonijiet għall-ksur tar-rekwiżiti tas-sorveljanza għal sistemi ta' ħlas sistemikament importanti (BĊE/2017/35)
ĠU L 299, 16.11.2017, p. 31–33
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
Fis-seħħ
|
16.11.2017 |
MT |
Il-Ġurnal Uffiċjali tal-Unjoni Ewropea |
L 299/31 |
DEĊIŻJONI (UE) 2017/2097 TAL-BANK ĊENTRALI EWROPEW
tat-3 ta' Novembru 2017
dwar il-metodoloġija għall-kalkolu ta' sanzjonijiet għall-ksur tar-rekwiżiti tas-sorveljanza għal sistemi ta' ħlas sistemikament importanti (BĊE/2017/35)
IL-KUNSILL GOVERNATTIV TAL-BANK ĊENTRALI EWROPEW,
Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari r-raba' inċiż tal-Artikolu 127(2) tiegħu,
Wara li kkunsidra l-Istatut tas-Sistema Ewropea tal-Banek Ċentrali u tal-Bank Ċentrali Ewropew, u partikolarment ir-raba' inċiż tal-Artikolu 3.1, u l-Artikolu 34 tiegħu,
Wara li kkunsidra r-Regolament tal-Kunsill (KE) Nru 2532/98 tat-23 ta' Novembru 1998, dwar il-poteri tal-Bank Ċentrali Ewropew li jimponi sanzjonijiet, (1) u partikolarment l-Artikolu 2 tiegħu,
Wara li kkunsidra r-Regolament (KE) Nru 2157/1999 tal-Bank Ċentrali Ewropew tat-23 ta' Settembru 1999 dwar il-poteri tal-Bank Ċentrali Ewropew li jimponi sanzjonijiet (BĊE/1999/4) (2),
Wara li kkunsidra r-Regolament (UE) Nru 795/2014 tal-Bank Ċentrali Ewropew tat-3 ta' Lulju 2014 dwar ir-rekwiżiti ta' sorveljanza għal sistemi ta' ħlas sistemikament importanti (BĊE/2014/28), (3) u b'mod partikolari l-Artikolu 23 tiegħu,
Billi:
|
(1) |
L-Eurosistema tippromwovi l-operazzjoni bla xkiel tas-sistemi ta' ħlas billi, fost affarijiet oħra, twettaq sorveljanza. B'mod partikolari, is-sorveljanza ta' sistemi ta' ħlasijiet sistemikament importanti (SIPS) issir bis-saħħa tar-Regolament (UE) Nru 795/2014 (BĊE/2014/28). |
|
(2) |
L-Artikolu 23 tar-Regolament (UE) Nru 795/2014 (BĊE/2014/28) jagħti s-setgħa lill-Bank Ċentrali Ewropew (BĊE) li jimponi sanzjonijiet għal ksur ta' dak ir-Regolament. Sabiex titjieb it-trasparenza tal-prinċipji u l-proċeduri li l-BĊE jsegwi meta jimponi dawn is-sanzjonijiet, dak l-Artikolu jeħtieġ li l-BĊE jadotta deċiżjoni dwar il-metodoloġija għall-kalkolu tal-ammont tas-sanzjonijiet. |
|
(3) |
Bl-adozzjoni ta' din id-Deċiżjoni, il-BĊE juri l-mod kif huwa ggwidat mill-prinċipju ta' proporzjonalità meta jiddetermina sanzjoni xierqa, |
ADOTTA DIN ID-DEĊIŻJONI:
Artikolu 1
Definizzjonijiet
Għall-finijiet ta' din id-Deċiżjoni:
|
1. |
“operatur ta' SIPS” tfisser operatur ta' SIPS kif iddefinit fil-punt (4) tal-Artikolu 2 tar-Regolament (UE) Nru 795/2014 (BĊE/2014/28); |
|
2. |
“sena tan-negozju” tfisser perijodu ta' żmien li inkonnessjoni miegħu għandhom jiġu ppreparati kontijiet awditjati jew statutorji tal-operatur ta' SIPS; |
|
3. |
“multa” tfisser l-ammont waħdieni tal-flus li operatur ta' SIPS huwa obbligat li jħallas bħala sanzjoni; |
|
4. |
“ksur” tfisser kwalunkwe nuqqas minn operatur ta' SIPS li jwettaq kwalunkwe obbligu li jirriżulta mir-Regolament (UE) Nru 795/2014 (BĊE/2014/28); |
|
5. |
“ħlasijiet ta' penali perjodiċi” tfisser ammonti ta' flus li, fil-każ ta' ksur kontinwat, operatur ta' SIPS ikun obbligat li jħallas, jew bħala kastig, jew bil-għan li l-operatur SIPS ikkonċernat jiġi mġiegħel jikkonforma mal-obbligi tiegħu skont ir-Regolament (UE) Nru 795/2014 (BĊE/2014/28). Dawn l-ammonti għandhom jiġu kkalkulati għal kull jum sħiħ tal-ksur kontinwat wara notifika lill-operatur ta' SIPS ta' deċiżjoni li teħtieġ it-terminazzjoni tal-ksur skont il-proċedura preskritta fit-tieni subparagrafu tal-Artikolu 3(1) tar-Regolament (KE) Nru 2532/98; |
|
6. |
“sanzjoni” tfisser multa jew ħlasijiet perjodiċi ta' penali imposti bħala konsegwenza ta' ksur; |
|
7. |
“fatturat” ifisser id-dħul iġġenerat mis-SIPS kkonċernat matul is-sena tan-negozju li tippreċedi dik meta sar il-ksur; |
|
8. |
“valur ta' ħlasijiet ipproċessati” tfisser il-valur medju ta' kuljum totali ta' ħlasijiet iddenominati f'euro pproċessati mis-SIPS ikkonċernati matul is-sena tan-negozju ta' qabel dik meta seħħ il-ksur. |
Artikolu 2
Prinċipji ġenerali
1. Din id-Deċiżjoni tistabbilixxi l-metodoloġija li għandha tiġi segwita mill-BĊE fil-kalkolu tal-ammont ta' sanzjonijiet li għandhom jiġu imposti mill-BĊE fuq operatur ta' SIPS għal ksur tar-Regolament (UE) Nru 795/2014 (BĊE/2014/28).
2. Il-BĊE jista' jimponi jew multa jew ħlasijiet ta' penali perjodiċi bħala sanzjoni għall-ksur tar-Regolament (UE) Nru 795/2014 (BĊE/2014/28).
3. Il-BĊE għandu jiddetermina l-ammont tas-sanzjoni li għandu jiġi impost skont proċess f'żewġ stadji, li jibda bil-kalkolu tal-ammont bażi tas-sanzjoni, li mbagħad jista' jiżdied jew jitnaqqas fid-dawl ta' ċirkustanzi aggravanti jew mitiganti ta' rilevanza għal kull każ speċifiku.
Artikolu 3
Kalkolu tal-ammont bażi ta' sanzjoni
1. Il-BĊE għandu jikkalkula l-ammont bażi ta' kwalunkwe sanzjoni li għandha tiġi imposta fuq operatur ta' SIPS b'referenza għall-fatturat u l-valur ta' ħlasijiet ipproċessati mis-SIPS ikkonċernati.
2. L-ammont bażi tas-sanzjoni għandu jirrappreżenta 50 % tas-somma tal-ammonti li ġejjin:
|
(a) |
1 % tal-fatturat; u |
|
(b) |
0,0001 % tal-valur tal-ħlasijiet ipproċessati. |
3. Għal ħlasijiet ta' penali perjodiċi, l-ammont bażi għandu jiġi diviż b'180 għall-kalkolu tal-ammont pagabbli għal kull jum sħiħ tal-ksur kontinwat.
Artikolu 4
Ċirkustanzi aggravanti u mitiganti
Meta jiġi kkalkulat l-ammont ta' kwalunkwe sanzjoni, il-BĊE għandu jieħu inkunsiderazzjoni, meta jkun rilevanti, iċ-ċirkustanzi tal-każ speċifiku, kif jipprovdi l-Artikolu 2(3) tar-Regolament (KE) Nru 2532/98.
Artikolu 5
Limiti
1. Meta, abbażi tal-kalkolu magħmul bis-saħħa tal-Artikolu 3(2) u kwalunkwe żieda jew tnaqqis fl-ammont bażi magħmula bis-saħħa tal-Artikolu 4, l-ammont ta' kwalunkwe multa jaqbeż EUR 500 000, l-ammont tal-multa li l-BĊE jista' jimponi għandu jkollu limitu ta' EUR 500 000.
2. Meta, skont il-kalkolu magħmul bis-saħħa tal-Artikolu 3(2) u (3) u kull żieda jew tnaqqis fl-ammont bażi magħmul bis-saħħa tal-Artikolu 4, l-ammont tal-ħlasijiet ta' penali perjodiċi jaqbeż EUR 10 000 kull jum tal-ksur, l-ammont tal-ħlasijiet perjodiċi ta' penali li l-BĊE jista' jimponi kuljum ta' ksur għandu jkun limitat għal EUR 10 000. Jistgħu jiġu imposti ħlasijiet ta' penali perjodiċi fir-rigward tal-perijodu massimu ta' sitt xhur wara n-notifika lill-operatur ta' SIPS bid-deċiżjoni li jiġu imposti sanzjonijiet.
Artikolu 6
Dispożizzjonijiet finali
Din id-Deċiżjoni għandha tidħol fis-seħħ fl-ghoxrin jum wara dak tal-pubblikazzjoni tagħha f'Il-Ġurnal Uffiċjali tal-Unjoni Ewropea.
Magħmul fi Frankfurt am Main, it-3 ta' Novembru 2017.
Il-President tal-BĊE
Mario DRAGHI
(1) ĠU L 318, 27.11.1998, p. 4.
(2) ĠU L 264, 12.10.1999, p. 21.
(3) ĠU L 217, 23.7.2014, p. 16.