EUR-Lex Aċċess għal-liġi tal-Unjoni Ewropea
Dan id-dokument hu mislut mis-sit web tal-EUR-Lex
Dokument 32019D0022(01)
Decision (EU) 2019/1312 of the European Central Bank of 22 July 2019 amending Decision (EU) 2016/810 (ECB/2016/10) on a second series of targeted longer-term refinancing operations (ECB/2019/22)
Deċiżjoni (UE) 2019/1312 tal-Bank Ċentrali Ewropew tat-22 ta' Lulju 2019 li temenda d-Deċiżjoni (UE) 2016/810 (BĊE/2016/10) dwar it-tieni serje ta' operazzjonijiet speċifiċi ta' rifinanzjament għal żmien itwal (BĊE/2019/22)
Deċiżjoni (UE) 2019/1312 tal-Bank Ċentrali Ewropew tat-22 ta' Lulju 2019 li temenda d-Deċiżjoni (UE) 2016/810 (BĊE/2016/10) dwar it-tieni serje ta' operazzjonijiet speċifiċi ta' rifinanzjament għal żmien itwal (BĊE/2019/22)
ĠU L 204, 2.8.2019, p. 123–124
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
Fis-seħħ
2.8.2019 |
MT |
Il-Ġurnal Uffiċjali tal-Unjoni Ewropea |
L 204/123 |
DEĊIŻJONI (UE) 2019/1312 TAL-BANK ĊENTRALI EWROPEW
tat-22 ta' Lulju 2019
li temenda d-Deċiżjoni (UE) 2016/810 (BĊE/2016/10) dwar it-tieni serje ta' operazzjonijiet speċifiċi ta' rifinanzjament għal żmien itwal (BĊE/2019/22)
IL-KUNSILL GOVERNATTIV TAL-BANK ĊENTRALI EWROPEW,
Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-ewwel inċiż tal-Artikolu 127(2) tiegħu,
Wara li kkunsidra l-Istatut tas-Sistema Ewropea ta' Banek Ċentrali u tal-Bank Ċentrali Ewropew, u b'mod partikolari l-ewwel inċiż tal-Artikolu 3.1, l-Artikolu 12.1, it-tieni inċiż tal-Artikolu 18.1 u t-tieni inċiż tal-Artikolu 34.1 tiegħu,
Wara li kkunsidra l-Linja Gwida (UE) 2015/510 tal-Bank Ċentrali Ewropew tad-19 ta' Diċembru 2014 dwar l-implimentazzjoni tal-politika monetarja tal-Eurosistema (BĊE/2014/60) (1),
Billi:
(1) |
Skont l-Artikolu 1(4) tal-Linja Gwida BĊE/2015/510 (BĊE/2014/60), il-Kunsill Governattiv jista', f'kull ħin, jibdel l-għodda, l-istrumenti, ir-rekwiżiti, il-kriterji u l-proċeduri għall-implimentazzjoni ta' operazzjonijiet tal-politika monetarja tal-Eurosistema. |
(2) |
Fit-28 ta' April 2016, fit-twettiq tal-mandat tiegħu tal-istabbiltà tal-prezzijiet u sabiex tissaħħaħ it-trasmissjoni tal-politika monetarja billi jingħata inċentiv ulterjuri għat-tislif mill-banek lis-settur privat mhux finanzjarju, il-Kunsill Governattiv adotta d-Deċiżjoni (UE) 2016/810 tal-Bank Ċentrali Ewropew (BĊE/2016/10) (2). Din id-Deċiżjoni pprovdiet għat-tieni sensiela ta' operazzjonijiet speċifiċi ta' rifinanzjament għal żmien itwal (TLTROs-II) li għandhom jitwettqu matul il-perijodu minn Ġunju 2016 sa Marzu 2017. |
(3) |
Fis-7 ta' Marzu 2019, sabiex jassisti fiż-żamma ta' kundizzjonijiet ta' tislif bankarju favorevoli u biex jappoġġja l-pożizzjoni aġevolanti tal-politika monetarja fi Stati Membri li l-munita tagħhom hija l-euro, il-Kunsill Governattiv iddeċieda li jmexxi sensiela ġdida ta' seba' operazzjonijiet ta' rifinanzjament fuq żmien itwal (TLTROs-III). Id-dispożizzjonijiet li jirrigwardaw it-TLTROs-III ser jiġu stiplati f'deċiżjoni separata. |
(4) |
Sabiex jiġi ffaċilitat il-kalkolu tal-limiti tal-offerti għat-TLTROs-III, u filwaqt li jittieħdu inkunsiderazzjoni kwalunkwe ħlasijiet lura bikrin u volontarji li jistgħu jsiru ta' ammonti mislufa taħt TLTROs-II, jeħtieġ li jiġi emendat il-perijodu ta' notifika għal dak il-ħlas lura bikri. |
(5) |
Sabiex istituzzjonijiet ta' kreditu jkollhom żmien biżżejjed biex jagħmlu preparamenti operazzjonali għall-ewwel TLTRO-III, din id-Deċiżjoni għandha tidħol fis-seħħ mingħajr dewmien żejjed. |
(6) |
Għalhekk, id-Deċiżjoni (UE) 2016/810 (BĊE/2016/10) għandha tiġi emendata kif meħtieġ, |
ADOTTA DIN ID-DEĊIŻJONI:
Artikolu 1
Emendi
Fl-Artikolu 6 tad-Deċiżjoni (UE) 2016/810 (BĊE/2016/10) il-paragrafi 3 u 4 huma ssostitwiti b'dan li ġej:
“3. Sabiex jibbenefika minn proċedura ta' ħlas lura bikri, parteċipant għandu jgħarraf lill-BĊN relevanti li biħsiebu jħallas lura bil-proċedura ta' ħlas lura bikri fid-data ta' ħlas lura bikri, tal-inqas ġimgħa qabel dik id-data ta' ħlas lura bikri.
4. In-notifika msemmija fil-paragrafu 3 għandha ssir vinkolanti fuq il-parteċipant kkonċernat ġimgħatejn qabel id-data tal-ħlas lura bikri li għalih tkun tirreferi. Nuqqas min-naħa tal-parteċipant li jħallas, bis-sħiħ jew b'mod parzjali, l-ammont dovut skont il-proċedura ta' ħlas lura bikri sad-data ta' ħlas lura jista' jirriżulta fl-impożizzjoni ta' penali finanzjarja. Il-penali finanzjarja applikabbli għandha tiġi kkalkulata skont l-Anness VII tal-Linja Gwida (UE) 2015/510 (BĊE/2014/60) u għandha tikkorrispondi mal-penali finanzjarja applikata għal nuqqasijiet ta' konformità mal-obbligi biex jiġi kkollateralizzat b'mod adegwat u mħallas l-ammont li l-kontroparti tkun ġiet assenjata fir-rigward ta' tranżazzjoni bil-maqlub għall-finijiet tal-politika monetarja. L-impożizzjoni ta' penali finanzjarja għandha tkun mingħajr preġudizzju għad-dritt tal-BĊN li jeżerċita r-rimedji stabbiliti għal meta jseħħ każ ta' inadempjenza kif stipulat fl-Artikolu 166 tal-Linja Gwida 2015/510 (BĊE/2014/60).”;
Artikolu 2
Dħul fis-seħħ
Din id-Deċizjoni għandha tidħol fis-seħħ fit-3 ta' Awwissu 2019.
Magħmul fi Frankfurt am Main, it-22 ta' Lulju 2019.
Għall-Kunsill Governattiv tal-BĊE
Il-President tal-BĊE
Mario DRAGHI
(1) Il-Linja Gwida (UE) 2015/510 tal-Bank Ċentrali Ewropew tad-19 ta' Diċembru 2014 dwar l-implimentazzjoni tal-qafas tal-politika monetarja tal-Eurosistema (BĊE/2014/60), (Linja Gwida dwar id-Dokumentazzjoni Ġenerali) (ĠU L 91, 2.4.2015, p. 3).
(2) Id-Deċiżjoni (UE) 2016/810 tal-Bank Ċentrali Ewropew tat-28 ta' April 2016 dwar it-tieni serje ta' operazzjonijiet ta' rifinanzjament immirati iktar fit-tul (BĊE/2016/10) (ĠU L 132, 21.5.2016, p. 107).